കുട്ടികളുടെ ഗെയിം കളി: കളിയോ, കാര്യമോ..?

കോവിഡ് അടച്ചിടലിന്റെ വിലക്കുകൾക്കിടയിൽ വ്യാഴാഴ്ച രാവിലെ കൊല്ലം മാതൃഭൂമി ഓഫീസ് തേടിയെത്തിയ ഈ അച്ഛനമ്മമാർ പറഞ്ഞത് എല്ലാ മാതാപിതാക്കളും അറിയണം. അന്നന്ന് പണിക്കുപോയി ജീവിക്കുന്നവരാണ് ഇവർ. അമ്മയാണ് സംസാരിച്ചത്. അച്ഛൻ നിറകണ്ണുകളോടെ എല്ലാം കേട്ടിരുന്നു.
'കൊല്ലം ജില്ലയിലെ സി.ബി.എസ്.ഇ. സ്കൂളിൽ പഠിക്കുന്ന ഞങ്ങളുടെ മകൻ പത്താം ക്ലാസ് കഴിഞ്ഞ് പ്ലസ് വണ്ണിലേക്ക് പോകേണ്ടതാണ്. ഒൻപതാം ക്ലാസ് വരെ പഠനത്തിൽ മിടുക്കനായിരുന്നു. സ്കൂളിലെയും നാട്ടിലെയും നല്ലകുട്ടി.
കഴിഞ്ഞവർഷം പഠനത്തിനായി വാങ്ങിയ ഫോണിൽ അവൻ ഓൺലൈൻ ഗെയിമിന്റെ കുരുക്കിൽവീണത് ഞങ്ങൾ അറിഞ്ഞില്ല. ഫ്രീ ഫയർ എന്ന ഓൺലൈൻ ഗെയിമിന് അടിമയായ എന്റെ കുഞ്ഞ് പെട്ടെന്ന് ഭ്രാന്തനെപ്പോലെയായി. പകൽമുഴുവൻ ഉറങ്ങും. രാത്രി ഉണർന്നിരുന്ന് ഗെയിം കളിക്കും. കളിയിൽ ഹരംകയറി അലറുകയും പൊട്ടിച്ചിരിക്കുകയും ചെയ്യും. ചിലപ്പോഴൊക്കെ ദുഃഖിച്ചിരിക്കും. പഠിക്കാൻ പുസ്തകം തുറക്കാറേയില്ല. പഠിക്കാതെ പണമുണ്ടാക്കാനറിയാമെന്ന് പറഞ്ഞ് തട്ടിക്കയറുകയായിരുന്നു ആദ്യം. ഞങ്ങൾ ശാസിച്ചാൽ തെറിപറയാൻ തുടങ്ങി.
ഒടുവിലത് ശാരീരികാതിക്രമങ്ങളിലേക്ക് മാറി. നാണക്കേടാകേണ്ടെന്നുകരുതി ആരോടും ഒന്നും മിണ്ടിയില്ല. മൂന്നും നാലും ദിവസം കുളിക്കില്ല. ഗെയിം കളിക്കാൻ പണം ആവശ്യപ്പെട്ടു നിരന്തരം ഞങ്ങളെ ഭീഷണിപ്പെടുത്തുകയാണിപ്പോൾ. പണമില്ലെന്ന് പറഞ്ഞാൽ ഭ്രാന്തനെപ്പോലെയാണ്.
വീട്ടുപകരണങ്ങൾ എറിഞ്ഞുടയ്ക്കുകയും ഞങ്ങളെ ആക്രമിക്കുകയും ചെയ്യും. കഴിഞ്ഞരാത്രി ഞങ്ങളെ രണ്ടുപേരെയും വീട്ടിൽനിന്ന്‌ ഇറക്കിവിട്ടു. ഇനിയൊരുകുഞ്ഞും ഈ ഗെയിമിൽ ജീവിതം തുലയ്ക്കരുത്. ഇനിയൊരച്ഛനുമമ്മയും ഇങ്ങനെ കരയേണ്ടിവരരുത്.'-കരഞ്ഞുകൊണ്ടാണ് അമ്മ പറഞ്ഞത്.
മകനെ ഒരു മനശ്ശാസ്ത്രജ്ഞനെ കാണിക്കാനുള്ള ശ്രമത്തിലാണിവർ. ഒരുവർഷമായി സ്മാർട്ട് ഫോണിനോട് ചങ്ങാത്തംകൂടിയ ഒട്ടേറെ കൗമാരക്കാർ വല്ലാത്ത കുരുക്കിൽപ്പെട്ടിരിക്കുകയാണ്. ഓൺലൈൻ ഗെയിമുകളിൽ ഒട്ടേറെ വിദ്യാർഥികൾ കുരുങ്ങുന്നതായി മനശ്ശാസ്ത്രജ്ഞൻമാരും കൗൺസലർമാരും സാക്ഷ്യപ്പെടുത്തുന്നു. ഗെയിം കളിക്കാൻ ഫോൺ കൊടുത്തില്ലെന്നുപറഞ്ഞ് 15-കാരൻ ആത്മഹത്യചെയ്ത സംഭവവുമുണ്ടായി.
മയക്കുമരുന്നിനേക്കാൾ ലഹരിയുള്ള കുരുക്കാണ് ഓൺലൈൻ ഗെയിമുകളെന്ന് മനശ്ശാസ്ത്രജ്ഞന്മാർ പറയുന്നു. ആദ്യം വിനോദത്തിനുതുടങ്ങി പതിയെപ്പതിയെ അടിമയാക്കുന്നതാണ് ഇതിന്റെ രീതി.
ഈ ലക്ഷണങ്ങൾ ശ്രദ്ധിക്കാം
:മുതിർന്നവരുടെ ശ്രദ്ധയില്ലാതെ ഇൻറർനെറ്റ് സൗകര്യം ലഭിക്കുന്ന കുട്ടികൾ ഓൺലൈൻ ഗെയിമുകളുടെ അടിമകളാകാൻ ഇടയുണ്ട്. രക്ഷാകർത്താക്കൾക്കാണ് ഇതിൽ പ്രധാന ഉത്തരവാദിത്വം. മദ്യത്തിന് അടിമയായ ഒരാൾ മദ്യം കിട്ടിയില്ലെങ്കിൽ ചെയ്യുന്നതെല്ലാം ഓൺലൈൻ ഗെയിമിന് അടിമയായ ഒരു കുട്ടിയും ചെയ്യും.
പറ്റാവുന്നിടത്തോളം കുട്ടികളെ ശ്രദ്ധിക്കുകയാണ് പോംവഴി. പഠനത്തിൽ ശ്രദ്ധക്കുറവ് കാണിക്കുന്നതാണ് ഇത്തരം അടിമത്തത്തിന്റെ ആദ്യലക്ഷണം. വീട്ടിൽ മറ്റുള്ളവർക്കൊപ്പം ഭക്ഷണം കഴിക്കാതിരിക്കുക, ഉൾവലിയാൻ ശ്രമിക്കുക, മുറിയിൽ കതകടച്ചിരിക്കുക, ദേഷ്യവും വിഷാദവും കാണിക്കുക, കൂട്ടുകാരോട് കളിക്കാൻ താത്‌പര്യം കാണാതിരിക്കുക തുടങ്ങിയവയെല്ലാം ലക്ഷണമാണ്. അടുത്തഘട്ടത്തിൽ ശാരീരികോപദ്രവം, പണം മോഷ്ടിക്കൽ, നശിപ്പിക്കാനുള്ള പ്രവണത തുടങ്ങിയവയുണ്ടാകും. ഈ ലക്ഷണങ്ങൾ കാണുന്ന കുട്ടികളെ അംഗീകൃത കൗൺസലർമാരെയോ മനശ്ശാസ്ത്രജ്ഞരെയോ കാണിക്കണം.
-ഡോ. സഞ്ജു ജോർജ്,
സീനിയർ കൺസൾട്ടന്റ് സൈക്യാട്രിസ്റ്റ്, ലിസി ഹോസ്പിറ്റൽ, എറണാകുളം.