കുഞ്ഞിന് മുലയൂട്ടുന്നിടത്ത് അച്ഛന് എന്ത് കാര്യം?

കുഞ്ഞിന് മുലയൂട്ടുന്നിടത്ത് അച്ഛന് എന്ത് കാര്യം?

ഡോ. ദിലീപ് കെ. എസ്

   

പൊന്നുരുക്കുന്നിടത് പൂച്ചക്ക് എന്ത് കാര്യം എന്ന് പറയുന്നത് പോലെ മുലയൂട്ടുന്നിടത്ത് ആണുങ്ങൾക്ക് എന്ത് കാര്യം എന്ന് നാം പലപ്പോഴും കേൾക്കാറുണ്ട്. ഈ വർഷത്തെ മുലയൂട്ടൽ വാരാചരണത്തിന്റെ പ്രമേയം 'മുലയൂട്ടൽ പരിരക്ഷണം: ഒരു കൂട്ടായ ഉത്തരവാദിത്തം ' എന്നതാണ്. മുലയൂട്ടൽ സ്ത്രീയിൽ മാത്രം നിക്ഷിപ്തമായ ഒന്നാണ്, പുരുഷൻ അതിൽ പ്രതൃകിച്ച് ഒന്നും ചെയ്യാനില്ല എന്ന മനോഭാവം മാറേണ്ടിയിരിക്കുന്നു. വളരെ വിജയകരമായി മുലയൂട്ടുന്ന അമ്മമാർക്ക് പോഷകാഹാരം മാത്രമല്ല ഊഷ്മളമായ സ്നേഹബന്ധവും പ്രോത്സാഹനവും പിന്തുണയും ആവശ്യമാണ്. അത് ഏറ്റവും നന്നായി കൊടുക്കാൻ കഴിയുന്നത് പങ്കാളിക്ക് മാത്രമാണ്. കുഞ്ഞിന്റെ ആരോഗ്യകരമായ മുലയൂട്ടലിന് പിതാവിന് ചെയ്യാവുന്ന പത്ത് കാര്യങ്ങൾ...

1. ആദ്യത്തെ കുഞ്ഞാണെങ്കിൽ മുലകൊടുക്കുന്നതിനെ കുറിച്ചുള്ള അടിസ്ഥാന സംശയങ്ങളും വിവിധ രീതികളും ഒരുമിച്ചിരുന്ന് മനസ്സിലാക്കാൻ ശ്രമിക്കാം.

2. മുല കൊടുക്കുന്നതിന് അനുയോജ്യമായ വിവിധ പൊസിഷനുകളിൽ കുഞ്ഞിനെ അമ്മയോട് ചേർത്ത് കിടത്തി കൊടുക്കാം.

3. പാൽ കൊടുത്തതിന് ശേഷം കുഞ്ഞിനെ തോളിൽ കിടത്തിയോ മടിയിൽ വച്ചോ പുറത്തു തട്ടി വയറിലുള്ള ഗ്യാസ് കളയാം.

4. പോഷകസമൃദ്ധമായ ആഹാരങ്ങൾ അമ്മ കഴിക്കുന്നുണ്ടെന്ന് ഉറപ്പ് വരുത്തുക.

5. പാൽ കൊടുത്തുകൊണ്ട് അമ്മ ഉറങ്ങിപ്പോകുന്നില്ല എന്ന് ഉറപ്പ് വരുത്തുക. ഉറങ്ങുന്നത് വഴി മുലപ്പാൽ കുഞ്ഞിന്റെ ശ്വാസനാളത്തിൽ കയറി അപകടമുണ്ടാക്കാൻ സാധ്യതയുണ്ട്.

6. മുലയൂട്ടലിന്റെ തുടക്കത്തിൽ ചില അമ്മമാർക്ക് വൈകാരികമായ ഉയർച്ചയും താഴ്ചയുമെല്ലാം ഉണ്ടാകാം, പ്രത്യേകിച്ച് പ്രസവാനന്തര വിഷാദാവസ്ഥയിൽ. ഈ അവസ്ഥയിൽ അവർക്ക് മാനസിക പിന്തുണ നൽകുക. അവരെ കേൾക്കാനും മനസ്സിലാക്കാനും ശ്രമിക്കുക. അവരോടൊപ്പം കൂടുതൽ സമയം ചിലവിടുകയും സംസാരിക്കുകയും ചെയ്യുക.

7. കുഞ്ഞിനെ കുളിപ്പിക്കുകയും നാപ്പിയും ഡ്രെസ്സും മാറ്റികൊടുക്കുകയും ചെയ്യാം.

8. വീട്ടുജോലികൾ പരസ്പരം സഹകരിച്ച് ചെയ്യാം.

9. അമ്മക്ക് രാത്രി ശരിയായി ഉറങ്ങാൻ പറ്റുന്നില്ലെങ്കിൽ രാവിലെ വിശ്രമത്തിനുള്ള സമയം നൽകുക

10. കുഞ്ഞിനെ അച്ഛന്റെ നഗ്നമായ നെഞ്ചിൽ (skin to skin care) കിടത്തി പരിചരിക്കാം. ഇത് കുഞ്ഞിന്റെ ശരീരോഷ്മാവ് ക്രമീകരിക്കുന്നതിനും അച്ഛനുമായുള്ള വൈകാരിക ബന്ധം സുദൃഡമാക്കുന്നതിനും സഹായിക്കും