ലോകത്ത് ഏറ്റവും കൂടുതൽ ഉപയോഗിക്കുന്ന മരുന്നുകളിൽ ഒന്നാണ് പാരസെറ്റമോൾ ടാബ്‌ലറ്റ്. പാരസെറ്റമോളിന്റെ കഥ കേട്ടോളൂ..

പാരസെറ്റമോളിന്റെ കഥ

_(ലോകത്ത് ഏറ്റവും കൂടുതൽ ഉപയോഗിക്കുന്ന മരുന്നുകളിൽ ഒന്നാണ് പാരസെറ്റമോൾ ടാബ്‌ലറ്റ്. ശരീരോഷ്മാവ് കുറയ്ക്കുന്നതിനും വേദനാ സംഹാരിയായും ഒക്കെ ഇത് ഉപയോഗിക്കുന്നു. കൊറോണ വൈറസ് മൂലമുള്ള പനി കുറയ്ക്കാനും വിദഗ്ധർ നിർദേശിക്കുന്ന പ്രധാന മരുന്നുകളിലൊന്ന് ഇതുതന്നെ. പാരസെറ്റമോളിന്റെ കഥ കേട്ടോളൂ)_

ഹലോ ഫ്രണ്ട്‌സ്, എന്നെ നിങ്ങളെല്ലാവരും അറിയുമെന്നു വിശ്വസിക്കുന്നു. ജീവിതത്തിൽ ഒരിക്കലെങ്കിലും എന്നെ ഉപയോഗിക്കാത്തവരായി ആരും ഉണ്ടാകില്ല എന്നാണ് എന്റെ വിശ്വാസം. ജനിച്ചു വീഴുന്ന കുഞ്ഞുങ്ങൾ മുതൽ പ്രായമായവർ വരെ പല രൂപത്തിൽ എന്നെ ഉപയോഗിക്കുന്നുണ്ട്. ഞാനാണ് നിങ്ങളുടെ സ്വന്തം പാരസെറ്റമോൾ. എന്റെ വിശേഷങ്ങൾ കേട്ടോളൂ.

എനിക്ക് ശരിക്കും മൂന്നു പേരുകൾ ഉണ്ട്. പാരസെറ്റമോൾ (paracetamol), അസെ റ്റമിനോഫിൻ (acetaminophen), എൻ-അ സെറ്റൈൽ പാരാ അമിനോ ഫീനോൾ (N-acetyl para aminophenol) എന്നിവയാണവ. ഇത് കൂടാതെ എൻ-4-ഹൈഡ്രോക്സി ഫിനൈൽ എതനമൈഡ് (N-4- hydroxy phenyl ethanamide) എന്ന ഒരു കെമിക്കൽ പേരിലും ഞാൻ അറിയപ്പെടുന്നു.

1877-ലാണ് എന്റെ ജനനം. ആദ്യമൊന്നും ഞാൻ ആരാലും ശ്രദ്ധിക്കപ്പെടാതെ കിടന്നു. 1887-ൽ ക്ലിനിക്കൽ ഫാർമക്കോളജിസ്റ്റായ ജോസഫ് വോൺ മെറിങ് (Joseph von Mering) ആണ് എന്നെ ആദ്യമായി മനുഷ്യരിൽ പരീക്ഷിച്ചത്. 1890-കളിൽ എന്നെപ്പറ്റി പലരും പഠനങ്ങൾ നടത്തി എന്റെ കഴിവുകളെക്കുറിച്ച് ബോധ്യപ്പെട്ടു. അങ്ങനെ, പത്തറുപത് വർഷങ്ങൾക്ക് ശേഷം 1945-1950 കാലഘട്ടത്തിൽ ഞാൻ സേവനമേഖലകളിലേക്ക് ഇറങ്ങിത്തിരിച്ചു.

എനിക്ക് വലിയൊരു കഴിവുണ്ട്. മനുഷ്യശരീരത്തിലെ ഉയർന്ന താപനില കുറയ്ക്കാനുള്ള സാധിക്കും. എന്നെ നിങ്ങൾ പനി കുറയ്ക്കാൻ ഉപയോഗിക്കുന്നത് ഇക്കാരണം കൊണ്ടാണ്. എല്ലാത്തരം പനിയും കുറയ്ക്കാൻ സഹായിക്കുന്ന എന്നെ ശാസ്ത്രം ആന്റിപൈറെറ്റിക്സ്(antipyretics) എന്ന വിഭാഗത്തിൽ പെടുത്തിയിരിക്കുന്നു. ചെറുതും വലുതുമായ പലതരം വേദനകളിലും ആശ്വാസമായി ഞാൻ നിങ്ങളുടെ മുന്നിൽ എത്താറുണ്ട്. അതുകൊണ്ട് വേദനാസംഹാരികൾ (analgesics) എന്ന വിഭാഗത്തിലും എന്നെ ഉൾപ്പെടുത്തിയിരിക്കുന്നു.

എനിക്ക് പല രൂപമുണ്ട്. ഖരരൂപത്തിൽ ഗുളികകൾ ആയും ദ്രാവകരൂപത്തിൽ സിറപ്പുകൾ ആയും ഇൻജക്ഷൻ രൂപത്തിലുമൊക്കെ ഞാൻ നിങ്ങളുടെ ശരീരത്തിൽ എത്തും. എന്നെകൊണ്ടു തനിയെ നിയന്ത്രിക്കാൻ കഴിയാത്ത വേദനകളിൽ ഞാൻ ചില കൂട്ടുകാരെയും കൂടെ കൂട്ടുന്നു. വൈദ്യശാസ്ത്രത്തിൽ എന്റെ പ്രധാന സേവനമേഖലകൾ താഴെ പറയുന്നവയാണ്.

▪️പനി: ഏതു കാരണം കൊണ്ടുണ്ടാകുന്ന പനിക്കും ഞാൻ നല്ല ഒരു ഔഷധമാണ്.

▪️വേദന: ചെറുതും വലുതുമായ വേദനകൾക്കു ഞാൻ ഒരു പരിഹാരമാണ്. എങ്കിലും അതികഠിനമായ വേദനകൾ എന്നെക്കൊണ്ട് തനിയെ പരിഹരിക്കാൻ പറ്റി എന്നുവരില്ല.

▪️വാതരോഗങ്ങൾ: വാതരോഗ സംബന്ധിയായ വേദനകൾക്ക് എന്നെ ഉപയോഗിക്കാറുണ്ട്.

▪️തലവേദന, പല്ലുവേദന എന്നിവയൊക്കെ കുറയ്ക്കാൻ എനിക്ക് കഴിയുന്നു. ചില ശസ്ത്രക്രിയകൾക്കു ശേഷമുണ്ടാകുന്ന വേദനകൾ ശമിപ്പിക്കാൻ മറ്റു ചില മരുന്നുകളുടെ കൂടെയും എന്നെ ചേർക്കാറുണ്ട്

സാധാരണ ഗതിയിൽ ഞാൻ ഒരു കുഴപ്പക്കാരനല്ല. വളരെ അധികം സുരക്ഷിതമായ മരുന്ന് എന്നാണ് എനിക്കുള്ള വിശേഷണം. പക്ഷെ, വളരെ ഉയർന്ന തോതിൽ ശരീരത്തിൽ എത്തുകയാണെങ്കിൽ ഞാൻ ചില പ്രശ്നങ്ങൾ ഉണ്ടാക്കും. പ്രായപൂർത്തിയായ ഒരാളിൽ ദിവസം 3-4 ഗ്രാം (3000-4000 മില്ലി ഗ്രാം) വരെ ഉള്ളിലെത്തിയാൽ ഞാൻ പ

കുഴപ്പമുണ്ടാക്കില്ല. അതിൽ കൂടുതൽ അളവിൽ എത്തിയാൽ ചില അപകടങ്ങൾ ഉണ്ടായേക്കാം. ഉയർന്ന അളവിൽ സ്ഥിരമായി എന്നെ ഉപയോഗിക്കുന്നവർക്കുണ്ടാകുന്ന വിപരീത ഫലങ്ങളിൽ ഏറ്റവും പ്രധാനപ്പെട്ടതാണ് കരൾ തകരാറുകൾ (liver damage). കരളിന്റെ പ്രവർത്തനങ്ങളിൽ ഇടപെടാൻ എനിക്ക് കഴിയും. ശരീരത്തിന് ആവശ്യമായ തോതിൽ ഉപയോഗിച്ചതിന് ശേഷം ബാക്കിയുള്ള എന്നെ പുറത്തുകളയുക എന്ന ഉത്തരവാദിത്തം കരളിനാണ്. ഉയർന്ന അളവിൽ ഞാൻ ശരീരത്തിൽ ഉണ്ടെങ്കിൽ കരളിന്റെ ജോലിഭാരം ഇരട്ടിക്കുന്നു. അത് കരളിന്റെ തകരാറിന് വഴിവെക്കും.

ഇനി ഏതെങ്കിലും കാരണവശാൽ ഞാൻ അമിതമായി അകത്തു ചെന്നു എന്നിരിക്കട്ടെ. തീർച്ചയായും നിങ്ങൾ ഒരു ഡോക്ടറുടെ സേവനം തേടേണ്ടതാണ്. ശരീരത്തിലെ എന്റെ അളവ് അമിതമായാൽ മണിക്കൂറുകൾക്കു ശേഷം മാത്രമേ ലക്ഷണങ്ങൾ കാണിക്കുകയുള്ളൂ. മനം പുരട്ടൽ, ഛർദി, അമിതമായ വിയർക്കൽ, വേദന എന്നിവയാണ് പ്രധാനപ്പെട്ട ലക്ഷണങ്ങൾ. അമിത അളവിലുള്ള എന്റെ ഉപയോഗം മൂലമുണ്ടാകുന്ന പ്രശ്നങ്ങൾ പരിഹരിക്കാൻ അസെറ്റിൽസിസ്റ്റിൻ (acetylcyestine) എന്ന മരുന്ന് ഉപയോഗിക്കുന്നു.

തലച്ചോറിനുള്ളിലെ സൈക്ലോഓക്സിജിനെെസ് (COX) എന്ന എൻസൈമിന്റെ ചില പ്രവർത്തനങ്ങളെ തടസ്സപ്പെടുത്തുവാനുള്ള ഒരു കഴിവ് എനിക്കുണ്ട്. അതുകൊണ്ടാണ് പനിയും വേദനയും കുറക്കാൻ എനിക്ക് കഴിയുന്നതെന്നാണ് ശാസ്ത്രജ്ഞർ പറയുന്നത്. ലോകാരോഗ്യ സംഘടനയുടെ അവശ്യമരുന്നുകളുടെ പട്ടികയിൽ സ്ഥാനം പിടിച്ച ആളാണ് ഞാൻ.

ഞാൻ സുരക്ഷിത മരുന്നാണ് എന്നു കരുതി വലിച്ചുവാരി തിന്നുകളയാം എന്നു കരുതരുത്. എന്തിനും ഏതിനും എന്നെ എടുത്ത് വിഴുങ്ങുന്ന ഒരു സ്വഭാവം നിങ്ങളിൽ ചിലർക്കുണ്ട് എന്നെനിക്കറിയാം.

അതത്ര നല്ല ശീലമല്ല. സ്ഥിരമായി എന്നെ വിഴുങ്ങുന്നവരോട് ഞാൻ അല്പം കുറുമ്പുകൾ കാട്ടും. അതിന് എന്നെ കുറ്റം പറഞ്ഞിട്ട് കാര്യമില്ല. അതുകൊണ്ട് ഒരു ഡോക്ടറുടെ ഉപദേശവും ഫാർമസിസ്റ്റിന്റെ നിർദ്ദേശവും അനുസരിച്ച് മാത്രം എന്നെ എടുത്ത് വിഴുങ്ങുന്നതാണ് ആരോഗ്യത്തിനു നല്ലത്.