അനീമിയ പരിഹരിക്കാൻ ചില മാർഗങ്ങൾ

ഇരുമ്പിന്റെ കുറവു മൂലമുണ്ടാകുന്ന വിളർച്ച (anemia), ഓരോ വർഷവും അരലക്ഷം പേരെ കൊല്ലുന്ന, അത്രയൊന്നും നിസ്സാരമല്ലാത്ത രോഗമാണ്. സ്ത്രീകളേയും കുട്ടികളേയുമാണ് ഇതു കൂടുതലായി ബാധിക്കുന്നത്. കേരളത്തിലെ സ്ത്രീകളിൽ മൂന്നിലൊന്നു പേരും വിളർച്ച ബാധിതരാണ്r എന്നാണു ദേശീയ കുടുംബാരോഗ്യ സർവ്വേയുടെ പഠനം സൂചിപ്പിക്കുന്നത്. കൃത്യമായ ആഹാരശീലം കൊണ്ടുമാത്രം പരിഹരിക്കാവുന്ന അസുഖം ആണെന്നിരിക്കേ കേരളത്തിൽ ഇത്രയുമധികം പേർക്ക് ഈ അസുഖം റിപ്പോർട്ട് ചെയ്യപ്പെടുന്നത് നമ്മെ ആകുലരാക്കുന്നു.

രക്തത്തിലെ ചുവന്ന രക്താണുക്കളുടെ കുറവാണ് വിളർച്ച ഉണ്ടാക്കുന്നത്. ഇവയിൽ ഓക്സിജൻ വഹിക്കുന്നതിനു സഹായിക്കുന്ന ഹീമോഗ്ലോബിൻ എന്ന പ്രോട്ടീന്റെ നിർമാണത്തിനാണ് ഇരുമ്പ് ആവശ്യമുള്ളത്. ചുവന്ന രക്താണുക്കളുടെ നിർമ്മാണം കുറയുകയോ നാശം വേഗത്തിലാകുകയോ ചെയ്താൽ വിളർച്ച ഉണ്ടാകാം. ശരീരത്തിൽ നിന്ന് വിവിധ കാരണങ്ങൾ കൊണ്ട് രക്തം നഷ്ടപ്പെടുന്നതും വിളർച്ചയ്ക്ക് കാരണമാകാം. ഇന്ത്യയെപ്പോലെയുള്ള വികസ്വര രാജ്യങ്ങളിൽ വിളർച്ചയ്ക്ക് പ്രധാനമായി കാരണമാകുന്നത് ഭക്ഷണത്തിലെ ഇരുമ്പിന്റെ കുറവും രക്തമൂറ്റിക്കുടിക്കുന്ന വിരകളുടെ സാന്നിധ്യവുമാണ്. സ്ത്രീകളിലെ മാസമുറയും രക്തം നഷ്ടപ്പെടുന്നതിനും അങ്ങനെ വിളർച്ച ഉണ്ടാകുന്നതിനും ഒരു പ്രധാന കാരണമാണ്.

ലക്ഷണങ്ങൾ

ക്ഷീണം, ഉത്സാഹക്കുറവ്, പഠനത്തിൽ പിന്നോട്ടു പോവുക, മിടിപ്പ്, കിതപ്പ് എന്നിവയൊക്കെയാണ് വിളർച്ചയുടെ പ്രധാന ലക്ഷണങ്ങൾ. തുടക്കത്തിൽ കാര്യമായ ലക്ഷണങ്ങളൊന്നും കണ്ടെന്നു വരില്ല എങ്കിലും ഗുരുതരമായ അവസ്ഥയിൽ ഹൃദയത്തിന്റെ പ്രവർത്തനത്തെ തന്നെ തകരാറിലാക്കാൻ വിളർച്ചയ്ക്ക് കഴിയും.

ഭക്ഷണത്തിൽ നിന്ന് ലഭിക്കാൻ

ഇരുമ്പിന്റെ കുറവുമൂലമുണ്ടാകുന്ന വിളർച്ച തടയുന്നതിന് ഇരുമ്പ് അടങ്ങിയ ഭക്ഷണപദാർഥങ്ങൾ മെനുവിൽ ഉൾപ്പെടുത്തുന്നത് സഹായിക്കും. ശരീരത്തിലേക്ക് പെട്ടെന്ന് ആഗിരണം ചെയ്യാൻ സാധിക്കുന്ന ഇരുമ്പു രൂപങ്ങൾ മാംസവിഭവങ്ങളിൽ നിന്നാണ് ലഭിക്കുന്നത്. മത്സ്യങ്ങളും ഇരുമ്പിന്റെ ഒരു നല്ല സ്രോതസ്സാണ്. ചീര അടക്കമുള്ള ഇലക്കറികളിലും പരിപ്പ്, പയർ വർഗ്ഗങ്ങളിലും മറ്റും ഇരുമ്പ് അടങ്ങിയിട്ടുണ്ട്. ഇരുമ്പിന്റെ ആഗിരണം മെച്ചപ്പെടുത്താൻ സഹായിക്കുന്ന വൈറ്റമിൻ സി കൂടുതലായി കണ്ടുവരുന്നത് വിവിധ തരം നാരങ്ങകളിലും നെല്ലിക്കയിലും ഒക്കെയാണ്. കൂടാതെ ഇരുമ്പുപയോഗിച്ച് ഹീമോഗ്ലോബിൻ നിർമ്മിക്കാൻ സഹായിക്കുന്ന വൈറ്റമിൻ ബി12, ഫോളിക് ആസിഡ് എന്നിവയും നമുക്ക് തൈരിൽ നിന്നും പച്ചക്കറികളിൽ നിന്നും ലഭിക്കുന്നു.

അയേൺ ഗുളികകൾ

ഭക്ഷണത്തിൽ നിന്നുമാത്രം എപ്പോഴും ശരീരത്തിന് ആവശ്യമായ ഇരുമ്പ് ലഭിക്കണമെന്നില്ല. ഉദാഹരണത്തിന് ഗർഭിണികളിൽ ഗുളികകൾ ഉപയോഗിച്ച് ഇരുമ്പ് സപ്ലിമെന്റ് ചെയ്യാറുണ്ട്. കൗമാരക്കാരിൽ വിളർച്ച തടയുന്നതിന് കേന്ദ്ര സർക്കാർ നടപ്പാക്കിയിട്ടുള്ള പദ്ധതിയാണ് WIFS. എല്ലാ ആഴ്ചയിലും ഒരു ദിവസം സ്കൂളിൽ നിന്ന് ഇരുമ്പ് ഗുളികകൾ വിതരണം ചെയ്യുന്നതാണ് പദ്ധതിയുടെ പ്രധാന ഘടകം. ഇത് കുട്ടികളിലെ വിളർച്ച കുറയ്ക്കുകയും അവരുടെ ബുദ്ധിശക്തി വർധിപ്പിക്കുകയും ചെയ്യുന്നു. ഇതിനുപുറമേ വിരശല്യം മൂലമുള്ള രക്തനഷ്ടം തടയുന്നതിന് വിര നിയന്ത്രണ ദിനാചരണത്തിനും വിര ഗുളികകൾ വിതരണം ചെയ്യുന്നതിനുമുള്ള പദ്ധതിയും ഉണ്ട്. ഈ ഗുളികകളെല്ലാം പൂർണ്ണ സുരക്ഷിതമാണ്.

ഹീമോഗ്ലോബിൻ പരിധിയിലധികം കുറഞ്ഞാൽ

രക്തത്തിലെ ഹീമോഗ്ലോബിൻ അളവ് ഒരു പരിധിയിലധികം കുറഞ്ഞാൽ ഭക്ഷണം വഴിയുള്ള ഇരുമ്പ് മതിയാകാതെ വന്നേക്കാം. ഇത്തരം അവസരങ്ങളിൽ രോഗിയെ അഡ്മിറ്റ് ചെയ്യുകയും ഇരുമ്പടങ്ങിയ മരുന്നുകൾ കുത്തിവക്കേണ്ടി വരികയും ചെയ്തേക്കാം. ചില സാഹചര്യങ്ങളിൽ രക്തം കയറ്റുകയും ആവശ്യമായേക്കാം. വിളർച്ചയ്ക്ക് ധാരാളം കാരണങ്ങളുണ്ടാകാമെന്നതിനാൽ യഥാർഥ കാരണമെന്തെന്ന് കണ്ടുപിടിക്കാനുള്ള പരിശോധനകളും ചെയ്യേണ്ടിവരും.